Carlos Aguirre Ekonomia sailburuak aldatu egin ditu bere iritzi edo aurreikuspenak hilabete batetik bestera, hau da, Aguirrek, azaroaren hasieran, 2010ean Euskal Herriko Hegoaldeko ekonomia %0,8 uzkurtuko zela aitortu zuen, baina abenduaren lehenengo astean, aldiz, atzeraldirik ez dela izango iragarri zuen sailburuak. "Aurtengoaren parekoa izango da edo hamarren batzuk hasiko da", gaineratu zuen Agirrek.
Hori horrela, Ekonomia sailburuaren adierazpenak gero eta baikorragoak direla esan genezake; ildo berari jarraituz, Aguirrek gehitu zuen: Òzikloaren okerrena igaro da, eta pixkana-pixkanaka zenbaki positiboetara itzuliko garaÓ. Suspertzea datorren urteko bigarren erditik aurrera emango dela ziurtatu du bilbotarrak; gainera, aurrerapauso hau inguruko ekonomien bilakaerari lotuta dago, esaterako, Frantzian eta Alemanian bi hiruhileko daramatzate hazkundearekin, eta, beste lurralde batzuen artean, EB, AEB eta Japonia ere atera dira atzeralditik.
Gipuzkoa eta Nafarroaren esportazioa
Esportazioen kasuan, Nafarroako Barne Produktu Gordina (BPG) urteko bigarren hiruhilekoan baino %0,5 handiagoa izan zen hirugarrenean, eta %0,3 handiagoa Gipuzkoan; hala ere, biek urte arteko tasa negatiboa izaten jarraitzen dute.
Alabaina, langabeziari dagokionez, Euskadin 2010ean ez da aldaketa nabarmenik egongo enpleguaren datuen inguruan (hori baieztatu du sailburuak), baina gutxiago haziko dela espero du Jaurlaritzak: 15.000 lanpostu galduko direla dio orain, duela hilabete baino 5.000 gutxiago. Dena dela, Aguirrek ziurtatu du, atzeraldia amaitu arren, 2010ean ekonomia sustatzeko politikei eutsi beharko zaiela. |
