EAEko Kontu Auzitegiko presidenteak, bere ardura edo kargua deskribatzeko orduan, honako hau adierazi du: "ez dugu ahalmenik kontu-arduragabetasuneko hutsuneak kalifikatzeko, hau da, hori ez da gure ardura, baizik eta Espainiako Kontu Auzitegiarena".

Legezkotasuna betetzea

Churiaquek egindako txostenek atal desberdinak dituzte, hiru zatitan desberdintzen direnak. Lehenengo eta behin, auzitegiko presidenteak esaten duen moduan, "legezkotasuna betetzearen inguruko iritzia ematea gure helburuetako bat da, hots, egiaztatzen dugu ea egungo ordenamendu juridikoa normaltasunez betetzen den ala ez". Bigarrenez, fiskalizatzen den entitate edo erakundearen dokumentazio ekonomiko-finantzarioari buruzko informazioa gauzatzen da. Azkenik, "lanaren helburua ez da akatsak edo iruzurrak hautematea, baizik eta kontu-erregulartasunaren txostena lortzea", baieztatu du presidenteak.

Fiskalizatu beharreko entitateak

Oro har, Martinez Churiaqueren sailaren aburuz, merkataritzaren inguruko erakunde guztiak fiskalizatu beharko lirateke, "batez ere kapital publikoa duten guztiak", dio Kontu Auzitegiko presidenteak. Ildo berari jarraituz, hiztunaren arabera, fundazio publiko ugarik ez dute auditoretzarik egiten; horregatik, "arrisku sailak" izenarekin ezagutzen dira; "gure helburuen artean dago, baita ere, entitate mota horiek fiskalizatu ahal izatea 2010ean", Churiaquek adierazi duenez.

Estatu mailari dagokionez, 8.155 udal daude guztira, baina soilik horietariko %1,5ek egin du auditoretza. Aldiz, Euskadiko hiriburuen kasuan, 20.000 biztanle baino gehiago dituzten udaletako askok, XXI. mendean, behin baino ez dute auditoretza egin, eta, batzuetan, ezta hori ere, adibidez, Durango, Galdakao edo Zarautzek.

EAEko udalak, berriz, 232 dira, eta azken 20 urteetan soilik %28k egin du auditoretza. Hiriburu nagusiei dagokienez, Bilbok eta Gasteizek bost aldiz egin dute ekintza hori, eta Donostiak, berriz, zazpi aldiz.

Dena den, "gure kezka edo ardura ez da kantitatea, baizik eta udalen sistemaren kalitate baxua", azpimarratu du Churiaquek. "Nire ustez, ez da onuragarria udalek eskarmentu edo esperientzarik gabeko enplegatu publikoak kontratatzea", gaineratu du Kontu Auzitegiko presidenteak.