Kontratugilearen profil berria Jaurlaritzak garatutako tresna da, eta Euskadiko sektore publikoaren esku ipini da
Carlos Aguirre Eusko Jaurlaritzako Ekonomia eta Ogasuneko sailburuak prentsaurrekoan aurkeztu du Ekonomia eta Ogasun saileko Ondare eta Kontratazio Zuzendaritzak garatu duen kontratugilearen profil berria.
Profil hau zortzi hilabeteetan garatu da eta, horrela, Eusko Legebiltzarraren agindua bete da.
Ildo berari jarraituz, kontratugilearen profil berria egiteko fasean harreman teknikoak ezarri eta informazio-trukeak egin dira enpresaburuekin, aldundiekin, hainbat udaletako ordezkariekin eta EUDELekin. Tresna hau aurrera eramateko 205.000 euroko inbertsioa egin da.
Sektore publikoko kontratuak
Era berean, sistema honek aukera emango die eskatzen duten administrazio eta enpresa publikoei sektore publikoko kontratuei buruzko legeak eskatzen duen informazioa argitaratzeko. Horrenbestez, nabarmen aurreztuko dira prozesuak, modernizatu egingo dira, eta herritarrak eta interesdunak errazago iritsiko dira administrazioarengana.
Gardentasuna
Kontratugilearen profil berri honen berritasun garrantzitsuenen artean, nabarmentzekoa da hedapen publikoaren hasiera-unea zalantzarik gabe egiaztatuko duen gailua, denboraren zigilua ipiniko duena. Espediente bati lotuko zaizkion enpresek mezu elektroniko bana jasoko dute espedientea profilean aldatzen den bakoitzean eta, era berean, argitaratutako informazioaren bertsio guztiak erkatzeko aukera egongo da; halaber, egin diren argitalpen guztiak azaltzen dituen trazabilitate-fitxategi bat ere egongo da, ziurtasun handiagoa emango diela enpresei.
Honen ondorioz, lehia handiagoa egongo da kontratazio publikoetarako sarreretan, gardenagoa izango da prozesua, eta prezio hobeak eskuratuko dira adjudikazioetan. Egin berri diren kontratazioetan argi ikusi da prozesua nabarmen murriztu dela, kontratatutako zerbitzuen kalitatea murriztu gabe.
