Antxoaren arrantzaren inguruko kudeaketari buruzko neurri edo arau berriak ezagutzeko, irailera arte itxaron beharko dute Europar Batasuneko instituzioek. Txosten juridikoa geldi geratu da, eta egingo diren aldaketak eta nondik norakoak datorren hilabetean ezagutuko dira.

Izaskun Bilbaok, EAJ-PNV alderdiko eurolegebiltzarkideak, aitortu du ez duela ezagutzen ebazpenak nola jarraituko duen; "planaren negoziazioa ezagutzea gustatuko litzaiguke, baina Kontseiluko legelariek ez dute tutik ere esango irailera arte", adierazi du Bilbaok. Eurolegebiltzarkide jeltzalea ez dago ziur, eta "posible da proposamenaren edukia ez mantentzea", baina momentuz ez da ezagutzen zein izango den Belgikaren joera, zeinek Espainiaren presidentziaren ordezkoa hartu duen hurrengo seihilekorako.

2011n ezar daiteke plan berria

Europako Legebiltzarra ere EBko Ministroen Kontseiluko legelarien txostenaren zain dago. Antxoaren arrantzaren erregulazioari buruzko proiektu berria edo eraldaketak ezagutzeko, itxaron egin beharko dute; horrez gain, atzerapen honek arau berriaren aplikazioa ere atzeratuko du, gutxienez 2011. urtera arte.

Mahai gainean dagoen proposamenari dagokionez, Brusela izan zen eztabaida ireki zuena duela urtebete, Kantauri itsasoko antxoaren arrantzari mugak jartzeko, baina tramitazioa geldiarazi egin zen, Espainiak eta Frantziak oinarri juridikoarekin bat egiten ez zutelako.