2006an, SENERek 50 urte bete zituen. Urteurren honen balantzea eginez gero, zein lorpenez sentitzen zarete harro eta zeintzuk dira zuen enpresan etorkizunerako dituzuen aurreikuspenak?
SENER 1956. urtean sortu zen ontzi-ingeniaritza bezala, baina gaur egun 4.800 profesional eta 920 milioi euroko fakturazioa duen teknologia eta ingeniaritza taldea da. Gure historian zehar, SENERek berriztapenera bideratu ditu esfortzu guztiak.
Gure enpresak ingeniaritzaren ekintza guztiak batzen ditu; horrez gain, energia eta ingurumenaren inguruko konpainietan parte hartzen du, eta industria aeroespazialean baita ere. Baditugu enplegatu eta bulego ugari hainbat lekutan, adibidez: Madril, Bartzelona, Buenos Aires, Aljer, Lisboa, Okayama (Japonia), e.a. SENER erreferentzia bihurtu da bai Estatuan, baita nazioarte mailan ere. Bestalde, irtenbide berriztatzaileak proposatzen ditugu, eta %10 inguruko inbertsioa egiten dugu I+G+i delakoan.
Etorkizunari begira, espero dugu egoera berean mantentzea, berriztapenekin, eta nazioarteko ingeniaritzan erreferentzia izaten jarraitzea.
Espainiako Estatuak CO2ko isurketak murriztu behar ditu Kyotoko protokoloa betetzeko eta Europar Batasunarekin duen konpromisoa mantentzeko; energia garbiek izan daitezke irtenbidea energia-politika hau aldatzeko?
Bai, zalantzarik gabe hori izan daiteke irtenbideetako bat. Energia eta ingurumen sailetik Torresol Energyko ekimena proposatu dugu; horrela, mundu osotik hedatu nahi ditugu eguzki-energiako plantak. Hala ere, inbertsioa kontuan hartzekoa da, baina denbora pasa ahala, kostuak murriztu egingo dira eta mota honetako energiaren errentagarritasuna handitu egingo da.
Jorge Sendagortak, SENEReko presidenteak, energia nuklearra Espainiara laster helduko dela adierazi du. Uste duzue energia nuklearra irtenbiderik zuzenena dela petrolioaren menpekotasuna saihesteko?
Alternatiba bat da, baina ez bakarra; beste aukera bat energia berriztagarriak izan daitezke. Kontuan hartu behar dugu oraindik ezin ditugula hondakin nuklearrak birziklatu, baina, denborarekin, teknologiak hori guztia posible egingo du. Energia nuklearra alternatiba zuzen bat izan daiteke; Europako hainbat estatu aukera hau planteatzen ari dira.
Krisia dela eta, inbertsioak gibelatzen dira edo proiektu berriak atzeratzen dira?
Gure kasuan, 2008. urtea marka onarekin itxi dugu, eta aurten ondo defendatu ahal izatea espero dugu. SENERen dibertsifikazioa oso positiboa da: Espazioa, Aeronautika, Kontrol eta Ekintza Sistemak, Ontzi Ingeniaritza, Energia eta Prozesuen Plantak, eta Ingeniaritza Zibil eta Arkitekturako sektorea. Egia esanda, nazioartean ezaguna den enpresa bat izateak ere laguntzen digu; izan ere, lehen azaldu dudan bezala, munduko hainbat gunetan gaude: Europa, Hego Amerika, Afrikako iparraldea, e.a. Horrek guztiak lagundu egiten digu krisi garaian ez erortzen.
Nola darama SENERek abagune ekonomikoa?
Lasaitasunez eta kontu handiz, 50 urte hauetan izan ditugun baloreak mantenduz eta errespetatuz, gure proiektu-multzo garrantzitsuari esker ibilbide zuzena daramagu. Era berean, oso garrantzitsuak dira berriztapena, kalitatea, bezeroengan dugun arreta, eta SENERen lan egiten dugunon arteko laguntasuna.
SENER Elkarteak Hego Amerika eta Europako Ekialdeko ingeniari berrientzako bekak ematen ditu. Espainiar Estatuan ingeniariak falta al dira?
SENER Elkartea Sendagorta familiaren ekimena da, 2003an sortutakoa. Elkartearen helburua ingeniaritzako ikasleen prestakuntza osatzea da; gehienbat baliabide gutxi dituzten herrialdeetako ikasleetan zentratzen gara. Elkarteak aukeratzen dituen ikasleek ikasketak non egin nahi dituzten aukeratu dezakete, gerora praktikak SENERen egiteko. Dena den, horrek ez du esan nahi etorkizunean gure enpresan lan egingo dutenik, baina egia da aukera ona dela gure plantillan lan egiteko. SENER Elkarteak ingeniaritza proiektuak ere finantzatzen ditu, eta sari-banaketak antolatzen ditu.
Bigarren galderari dagokionez, erantzuna baiezkoa da; Espainian ingeniari falta dago, batez ere esperientzia duten ingeniariak. Gutxienez, krisiaren aurretik eskaera eskaintza baino handiagoa zen.
Estatuko unibertsitateetan gero eta ikasle gutxiago matrikulatzen dira. Unibertsitateek prestakuntza aproposa ematen dute?
Espainiako eskolen heziketaren kalitatea ona dela uste dut, baina agian hobetu egin behar dira. Azken bolada honetan, nabaritu dugu lizentziatu berri diren ikasleen maila nahiko baxua dela; behinik behin, SENERera heltzen direnek gero eta kualifikazio gutxiago izaten dute, eta hori, nire ikuspuntutik, oso kezkagarria da.
Bestalde, prestakuntzari dagokionez, unibertsitateek, orokorrean, ikasleen analisi, sintesi eta sormen gaitasunak garatu behar dituzte. Gerora, urteak pasa ahala, enpresetan edo lanpostu desberdinetan lortuko dute espezializazioa.
Momentu honetan zein da euskal ingeniaritzaren osasuna? Eta, orokorrean, Estatukoarena?
Oso osasun ona, zalantzarik gabe. Estatuan eta, zehazki, Euskadin, ingeniaritza enpresa handiak eta osasuntsuak daude, mundu osoko herrialde desberdinetan zehar proiektuak aurrera eramaten dituztenak.
Duela hilabete batzuk, Eusko Jaurlaritzari besterendu zaio I+G arloko eskumena. Zuek, adibidez, portzentaje garrantzitsu bat inbertitzen duzue ikerketa eta garapenean. Zein mesede egiten die horrek SENER bezalako euskal enpresei?
I+G politika aurrera eramaten duten instituzioen gorakada ona da.
Industrian, herrialde batzuek gorakada izugarria izan dute azken urte hauetan, esaterako, India eta Txinaren BPG igo egin da. Nola egin aurre asiar erraldoi hauei?
Txina eta Indiako aurrerapena eta haien sarrera "lehenengo munduan" oso azkarra izaten ari da, eta, aldi berean, beharrezkoa. Nire ustez, aukera bezala ikusi behar dugu, eta ez mehatxua izango balitz bezala. Era berean, kontuan izan behar dugu sarrera honekin merkatu berriak irekitzen direla. Gauzak horrela, gure produktuak milioika pertsonarengana iritsi daitezke.
Tarifa erregulatua desagertzearen ondorioz, elektrizitatea %50 garestitu da industriaren sektorearentzat. Kaltetuak izan zarete neurri berri horren ondorioz?
Kostuen gorakada inoiz ez da berri positibo edo ona izaten; hala ere, kasu honetan, ez dugu energia asko kontsumitzen, eta, beraz, neurri berri horrek guri ez digu hainbeste eragiten.
