Krisi garaian enpresa batzuek inoiz baino hobeto egiten dute aurrera; eredu argi bat El Cobrador del Frac izan daiteke. Berankorren kopurua igo egin da azken bolada honetan, eta horrek lan gehiago dakarkio negozio honi. Espainiako Estatuan ez ezik, Portugal eta Frantziako zenbait hiritan ere zabaldu da kobratzeko era hau. Esteban Gil Espainiako Iparraldeaz arduratzen da eta azken hilabeteetan inoiz baino lan gehiago izaten ari da.
Guztiok noizbait entzun dugu El Cobrador del Frac-en inguruko zerbait, baina zeintzuk dira zehazki zure enpresak eskaintzen dituen zerbitzuak?
Bi motatan bana ditzakegu zerbitzuak; alde batetik, zorren kobrantza edo ordaingabeak; eta, bestetik, prebentzio zerbitzua. Azken horretarako, datu-base bat daukagu, eta, bertan, urte hauetako guztietako zorrak bildu dira.
Zorrak kobratzeko orduan, normalean arrakasta izaten duzue eta aurreikuspenak betetzen dituzue?
Batez ere zor berankorra lantzen dugu, eta, horien artean, gehienbat, urte bat baino gehiago duten zorrekin lan egiten dugu. Gure enpresak arrakasta handia du; %70aren gainetik gaude. Horrek ez du esan nahi zor guztien %100 berreskuratzen dugunik, baizik eta gure kasuen %70ek arrakasta izaten duela eta zor osoa edo gutxienez zati bat berreskuratzen dugula.
Krisi garaian berankortasun tasa igo da; nabaritu al duzue El Cobrador del Frac-en?
Bai. Joan den urteko irailetik, eskaera igo egin da, eta Iparraldeko zonaldean eskaera hori bikoiztu egin dugu, aurreko urtearekin alderatuz. Jendea urduriago dago, eta norbaitek bi egunean bere zorra ordaintzen ez badu, kobratzaileak laster deitzen digu.
Seguruenik, sektore desberdinetako bezeroak dituzue, baina esango zeniguke zein den sektorerik nagusiena Euskadiko El Cobrador del Frac-entzat?
Euskadin, Espainiako Estatuan bezala, eraikuntzaren sektorea izaten ari da nagusiena. Hemendik aurrera, edozein sektorek izan ditzake zorrak. Kate bat izango balitz bezala funtzionatzen du mundu honek; eraikuntzarekin hasi eta gainontzeko sektoreak banan-banan erortzen dira.
Euskadin dauden berankorrak Estatukoekin alderatuz, ze balantze egingo zenuke? Negozio honek arrakasta handiagoa du hemen Espainian baino?
El Cobrador del Frac Espainia osoan eta Portugalen ere badago. Ni Iparraldeko zonaldeaz arduratzen naiz, eta hemen izaten ditugun emaitzak oso antzekoak dira. Estatu osoan eta Portugalen berdin gertatzen dela esango nuke; lan egiteko era berdina da eta horrek dakar emaitzak ere berdinak (edo antzekoak) izatea.
Eta Euskadiri dagokionez, esango zeniguke zein lurralde historikotan dagoen berankor tasarik handiena, edo non duzuen eskaerarik handiena?
Logikoa denez, Bizkaian, biztanle, industria eta enpresa txiki eta handi gehiago daudenez, proportzionalki berankor tasarik handiena bertan dago. Hala ere, Bizkaia, Gipuzkoa eta Araban emaitzak oso antzekoak dira; agian, alde handiagoa dago Kantabriako emaitzekin alderatuz gero. Estatu osoko datuak aztertuz gero, Kantabriako berankorren indizea Estatuko gainontzeko lurraldeetakoa baino askoz altuagoa izan da azken urte honetan.
Talde batzuk kexatu egin dira zerbitzu hau matxista delako, bertan bakarrik gizonek lan egiten dutelako; zer deritzozu horri?
Ez nago batere ados; gure enpresan behin baino gehiagotan saiatu gara emakumeak kontratatzen, baina, egia esanda, frac-a gizonezkoen jantzia da, eta emakume bat jantziko balitz, mozorrotuta doala emango luke. Dena den, lanpostu hau emakume bati eskaini diogun bakoitzean, ez du onartu nahi izan; beraiei ez zaie gustatzen mota honetako lanak egitea, eta, beraz, agian beraiek dira jarrera matxista duten lehenak.
Era berean, intimitate eskubideari eta irudi pertsonalari buruzko kritikak entzun dira; nola egiten diezu aurre kritika horiei?
Zordunak ez dira molestatuak izan nahi; gehienetan, nahiago dute epaile baten aurrean argitzea kasu hauek, baina argi dago egiten duguna bidezkoa dela, bestela ez genuke negozio hau martxan izango. Mugak ere baditugu, noski, baina bidezkoa da lan honegatik kobratzea eta frac-a ere eraman dezakegu. Nire ustez, pertsona bati kobratzeko edo gurea den dirua berreskuratzeko bisitatzea nahitaezkoa da, baina beti mehatxurik egin gabe. Berankorrari ez bazaio metodo hori gustatzen, badaki zer egin behar duen, ordaindu eta kito.
Oso bitxia da, eta mito bihurtu da, bai langileen janzkera zein zordunengana hurbiltzeko era; El Cobrador del Frac-en sorreran bezala egiten duzue lan?
Kobratzaile uniformatuaren irudia gero eta gutxiago erabiltzen da, ez da beharrezkoa kobratzeko orduan frac-a janztea. Kasu batzuetan, kobratzailearen eta zordunaren artean norgehiagokak edo gatazkak sortzen dira, batez ere ÒmozorroaÓ daramanean, baina, azken finean, kobratzailea bere lana egiten ari da eta soilik mezulariaren lana egiten du.
Helburua lortu ondoren, zeintzuk dira enpresaren onurak? Eta xedea lortu ezean?
Zorraren kopuruaren arabera kobratzen dugun portzentajea handiagoa edo txikiagoa izan daiteke, baina badugu negoziaezina den portzentajea ere, %40koa. Dena den, argitu nahi dut soldata honekin ezin zarela oso aberats bihurtu; izan ere, diru asko inbertitu behar dugu negozio honetan, eta, kasu batzuetan, irabaziak izan ordez, galerak izaten ditugu (dirua berreskuratzen ez dugun kasu askotan, esaterako).
