Alberto García Erauzkin
Euskalteleko aholkulari zuzendari orokorra

Euskaltel taldeak, Euskadiko enpresarik sendoenetarikoak, ez ditu modu larrian nabaritzen krisialdiaren ondorioak, edo hori adierazi du, behintzat, taldeko aholkulari zuzendari orokorra den Alberto García Erauzkinek. Erandioztarrak kargu bera dauka 2000. urtetik, eta Ekonomiaren KZrekin bildu da Euskalteleko balantzearen eta aurreikuspenen inguruan hitz egiteko.

Emaitzak ez dira berdinak izan Euskaltelen eta sektorean orokorrean. 2009an, etekinei begira, gure sektoreak bilakaera negatiboa izan du (%7 eta %8 puntu arteko beherakada). Euskaltelen, berriz, datuak oparoagoak izan dira: joan den urtean, taldeak bezero ge­hiago bildu ditu, etekinen egoera mantendu du eta emaitzak hobetu ditu. Beraz, modu honetan, euskal merkatuan lidergoa handitu ahal izan dugu.

Etorkizunari begira, zeintzuk dira Euskaltelen aurreikuspenak 2010. urterako? Eta zeintzuk dira entitatearen helburu nagusiak epe luzerako?

Ez da erraza iragarpenak zerrendatzea krisiaren erritmoa ezegonkorra dela ikusita, baina gure helburu orokorrak dira, betiko moduan, bezero kopurua gehitzen jarraitzea eta etekinak eta emaitzak hobetzea.

Epe luzeari dagokionez, gure nahia da esparru geografikoa handitzea eta beste merkatuetara iristea.

Krisialdi ekonomiko finantzarioan murgilduta gaudela kontuan hartuz, sektorearen lehiakortasuna gogorra al da momentu honetan?

Sektore honetako lehiakortasuna, bereziki, oso gogorra da, eta Euskaltelen kasuan, Euskadiko merkatuan ditugun lehiakideak lider mundialak dira. Horretaz gainera, sektorearen eskaintza berriak oso erakargarriak izaten dira, eta zaila da gainditzea; horrek, beste faktore batzuen artean, zerbitzuaren prezioak murrizten ditu.

Zertan desberdintzen da Euskaltel gainerako telefono-operadoreetatik?

Euskaltelen desberdintasuna, hasieratik, sare teknologikoaren aldeko apustua izan da. Bestalde, zerbitzu berritzaile askoren integrazioan ere zentratu gara (telefonia finkoa, banda zabala, telebista digitala, telefonia mugikorra eta abar).

Esan genezake enpresa­ren produktu izarra zuntz optikoa dela? Zeintzuk dira bere abantailak? Datozen urteetan ere Euskaltelen produktu nagusia izaten jarraituko du?

Zuntz optikoa Euskaltelek merkatuari eskaintzen dion sinbolorik adierazgarriena da. Gainera, zalantzarik gabe, gure produktu izarra izaten jarraituko du, etorkizuneko zerbitzu berri askoren oinarria baita.

Hori dela eta, gure xedea da maila berean mantentzea eta zuntz optikoan inbertitzen segitzea, teknologikoki herrialde aurreratuenen artean kokatu gaituen sarea baita. Gauzak horrela, 2009. urtea bukatu zenetik, Euskaltelek 285.000 kilometroko zuntz optikoa hedatu du EAE osoan.

Teknologiari dagokionez, zein izango da Euskaltelen hurrengo erronka edo apustua?

Taldearen erronkarik esanguratsuena da gure bilakaera eta garapena arrakastarekin jarraitu ahal izatea. Horretarako, lan izugarria egingo dugu sareen integrazioen errefortzuan, batez ere, Euskalteleko bezeroei zerbitzu ezin hobea eskaintzeko eta edozein momentuan edota lekutan gure zerbitzuaz gozatzeko.

Vodafone taldearekin duela bi urte baino gehiago sinatutako itunaren inguruan, zeintzuk izan dira lortutako ondorioak eta emaitzak?

Akordio hori oso positiboa izan zela esango nuke, telefonia mugikorreko sarbideari dagokionez, Vodafone hornitzailerik onenetakoa baita. Horren ondorioz, une honetan, Euskaltel Vodafoneren bezerorik garrantzitsuenetarikoa da Europa mailan.

Horregatik, gaur egun ez dugu arrazoirik beste aukerarik bilatzeko edo beste enpresaren batekin sarbide berria hitzartzeko.

Azkenik, Euskadin azken urte honetan izandako aldaketa politikoaren ondorioz, Euskaltel taldean, oro har, bestelako ekimen azpimarragarriren bat egin da?

Eusko Jaurlaritzak Euskal Autonomia Erkidegoan telekomunikazio zerbitzu gehien kontsumitzen duen entitate edo instituzioa da; gainera, Euskaltelen bezeroa da duela 12 urte baino gehiago. Beraz, gobernu aldaketa dela medio, Euskaltelen eta Jaurlaritzaren arteko hainbat solaskide aldatu egin dira, baina harremanak oparoa eta positiboa izaten jarraitzen du.