Eusko Jaurlaritzako azkeneko bi lehendakariak ezagutu dituzu eta bien agintaldian lan egin duzu; ildo berari jarraituz, ekonomia arloan, zeintzuk izan dira nabari dituzun aldaketarik esanguratsuenak?

Erakunde arteko lankidetza dela eta, nola Ibarretxeri hala Lópezi eskaintza irmoa eta zintzoa egin diegu, Gipuzkoarentzat eta Euskadirentzat gako diren gaietan. Zehatzago esanda: gobernu berria jakitun da, behin baino gehiagotan adierazi diogun bezala, krisi ekonomikoari dagokionez gu prest gaudela, ditugun desberdintasun politikoak direnak izan arren, lana partekatzera, talde lana egitera eta erakunde arteko lankidetza ahalik eta gehien jorratzera.

Krisialdi ekonomikoari dagokionez, kezka nagusietako bat izan da ogasunek diru gutxiago bildu dutela. Zergatik izan da txikiagoa zerga-bilketa, batez ere Gipuzkoan?

Zerga-bilketak behera egin zuen izugarri 2009. urtean, hain zuzen ere, %17 jaitsi ziren gure diru-sarrerak. Honen arrazoia, begi bistan da, krisiak enpresen jardueran izan duen eragina izan da.

Zerga politikari dagokionean, egungo egoerak eskatzen duen malgutasuna erakutsi dugu, eta, horretarako, erraztasunak eskaini dizkiegu familiei eta enpresei. Pertsona fisikoen gaineko zergak bigundu egin ditugu familien likideziari laguntzeko eta Sozietateen gaineko zergaren ordainketan atzerapenak edo luzapenak baimendu ditugu, enpresen kaudimena ito ez dadin.

2009. urtea oso negatiboa izan da langabeziari dagokionez; zeintzuk dira Gipuzkoako Aldundian egiten dituzuen aurreikuspenak urte honetarako gai honen inguruan?

2009. urteko azkeneko bihiru hilabeteetan, gure hazkundeak, nahiz eta maila oso txikian, emaitza positiboak eman ditu Gipuzkoan. Honekin batera, badirudi Europako ekonomia nagusietan ere zer edo zer mugitzen hasi dela, eta pertzepzio hori guztiz garrantzitsua da gure ekonomiaren garapenaren hasierarako. Dena dela, oso kontuan hartu behar dugu, aurreikuspen guztien arabera, Espainiako ziklo aldaketa atzeratu egingo dela eta horrek gure ekonomiarengan ere eragina izango duela 2010. urteari begira.

Maneiatzen ditugun testuinguru ekonomikoen arabera, urte honetan hazkunde maila motela izango dugu, eta, zoritxarrez, langabezia tasak gizentzen joango dira.

Bestalde, Donostiako metroa egiteko ideia zein fasetan dago? Beharrezkoa al da azpiegitura hori gauzatzea hiriburuan?

Esan genezake lehenengo urratsetan gaudela. Eskuduntza Eusko Jaurlaritzarena da, eta berak adierazi du martxan jarriko dituela ikerketak Donostiak metro zerbitzua izateko. Gogoan izan Gipuzkoako biztanleria guztiaren %60 eskualde honetan bizi dela. Mugikortasuna tren sarea egokituz eta bikoiztuz eta zerbitzu eta maiztasunak ugarituz bermatu liteke, metro batek eskaini dezakeen gisa.

Askok kritikatu dute krisi garaian azpiegitura ugaritan dirua xahutzea, metroa, Hondarribiko aireportua edo AHT, besteak beste. Garai honetan, lehentasuna al dute obra hauek beste kontu batzuen aurrean?

Gipuzkoaren aberastasuna, neurri handi batean, bere industrian oinarritzen da. Egiten eta sortzen duguna ahalik eta azkarren munduko beste puntara helarazteko gai izango diren bitarteko eta azpiegiturak behar ditugu. Ezinbestekoa da, etorkizunaren aldeko apustua egin nahi badugu.

Diputazioak argi ditu bere lehentasunak, eta horrela bildu ditugu “2010 Krisiaren Aurkako Gipuzkoa Plana” egitasmoan.

Azkenik, zer deritzozu Gipuzkoako errepide nagusietan bidesariak jartzeari?

Gipuzkoako Foru Aldundiari dagokio Batzar Nagusien eztabaidako ondorioak foru arau batean garatzea. Noski, Batzar Nagusien ebazpena osatzen duten oinarriei erantzungo die foru arauaren edukiak: gure bide sarean aplikatzea ingurumen iraunkortasunaren printzipioak, Gipuzkoaren lurralde oreka sustatzea eta gai honi dagokionez Europako Batasunetik datozen joera berrietara egokitzea.