Zein da Lanhitz programaren helburu nagusia? Zein izan zen sorreraren arrazoia?

Lanhitz programaren helburu nagusia enpresa munduan euskararen presentzia eta erabilera sendotzea da. Horretarako, zenbait baliabide jarri dira hasieratik entitateen esku, hala nola, diru-laguntza bera, egoeraren diagnosia egiteko aplikazio informatikoa edota jendea sentsibilizatzeko kanpainak.

Joan den urtean programak lortutako emaitzekin pozik geratu zineten?

Erronka, izatez, ez da erraza, orain arteko ohitura eta inertziei aurre egin behar baitzaie. Oro har ari naiz, zenbait kasutan euskalduntzea berez, inongo laguntza edo kanpoko bultzadarik gabe, hasitako prozesua izan baita. Iazko emaitzak onak izan baziren ere, bada tarterik hobetzeko. Euskalduntze prozesuan lagundu dezakegu, baina euskalduntzearen aldeko apustua enpresena da.

Zeintzuk dira enpresek bete behar dituzten baldintzak Lanhitz programan sartzeko eta aipatutako diru-laguntza jasotzeko?

Arestian zeharka bada ere aipatu dudan auto-finantzazioaz gain, bete behar dituzten baldintzak ez dira asko. Programak ezartzen duen eredua erabili behar dute, bai hizkuntza egoerari buruzko analisia egiterakoan bai euskara planaren urteko kudeaketa plana aurkezterakoan ere. Programatik kanpo gelditzen diren entitateak kapitalaren erdia baino gehiago administraziotik jasotzen dutenak dira.

Oro har, zuen ustez zein da enpresarien jarrera programa mota hauen aurrean?

Urte hauetan Lanhitzek izan duen bilakaerari erreparatuz gero, argi dago enpresa munduak euskara erabiltzeko borondatea erakutsi duela. Enpresa batzuek, gainera, egina zuten beren ibilbidea aurretiaz, eta horren isla dira dagoeneko Bikain ziurtagiria daukaten entitateak.

Azkenik, Koordinaziorako Zuzendaritzari begira, zeintzuk dira Hizkuntza Politikaren ildo nagusiak?

Gure Zuzendaritzan eragin handiena izan dezaketen ildoen artean, erakundeen arteko eta alor pribatuarekiko elkarlana litzateke funtzio nagusietako bat. Izan ere, hizkuntzaren inguruko irizpideak eta ekimenak adosteko beharra dugu oraindik. Bestalde, Koordinaziorako Zuzendaritzatik ikerketa proiektuak bultzatu eta bideratzen ditugu, besteak beste, euskal hiztunen egungo egoera ezagutu eta etorkizunean egin litezkeen ekimenen proposamenak lantzeko, betiere, adostasunik zabalena bilatuz.