Egunero krisialdiaren inguruko albisteren bat entzuten dugu, baina zer eragin du egungo egoera ekonomikoak Bilboko Alde Zaharreko merkataritzan?

Edozein aldaketak ondorioak ditu arlo ekonomiko edo sozialean, batez ere enpresa txikia edo ertaina duzun neurrian. Egun, merkataritza-sektorean eragina nabaria da, izan ere, jendeak gero eta diru gutxiago gastatu nahi du eta erosketa kopurua jaitsi egin da. Beraz, orain, enpresaburuak ez daude zentratuta etekinak ateratzean, baizik eta negozioa aurrera eramatean. Azken finean, bihozkada-erosketa desagertu egin da, eta, orain, erosketa arduratsua eta aisialdiarekin lotura duena gailendu da.
Dena dela, Alde Zaharrean helburua errazago bete daiteke; tradizioa, bertako ostalaritza-eskaintza edo Erriberako Merkatuak bere alde jokatzen duten ezaugarriak dira. Bestalde, turismoaren garapenak ere laguntzen du, Bilbao bisitatzen duten pertsonak Alde Zaharrera gerturatzen baitira.

Garai honetan arriskutsua da negozio berria irekitzea; azken hilabeteetan enpresaburu edo ekintzaile ausartak egon al dira?

Bai, noski. Azkenaldi honetan saltoki berri ugari ireki dira Alde Zaharrean, egoera ekonomikoa gorabehera. Besteak beste, gune honetan instalatu diren dendak hauek izan dira: La Casa del Yogur, Café de Santiago, Poupée Chic edo Eko Kultura. Horiek adibide batzuk baino ez dira.

Bestalde, saltoki historiko batzuek ateak ixten dituzten bitartean, negozio mota berriak instalatzen dira gure inguruan, urrea saltzen dutenak edo ekialdeko bazarrak, esaterako. Zein da elkartearen iritzia gaiaren inguruan?

Denda historikoen itxiera normala dela esango nuke; belaunaldi-txandakatzea gero eta gutxiago gertatzen da, eta hor hutsune bat dago.
Bazarren kasua beste mota bateko kontua da; alde batetik, gobernuen konpromisoak daude, zergen inguruko kontribuzioari begira; bestetik, herrialde asiarren garapen ekonomiko eta demografikoa ere kontuan hartzekoa da.
Urrea saltzen duten saltokiak denboraldi baterakoak dira; garai zehatzetan agertzen dira, kasu honetan urrearen balioak gora egin duelako, baina hori ohikoa da.

Oro har, zer iritzi duzu azalera handiko merkataritza-guneen inguruan?

Azalera handiko merkataritza-guneek beste liga batean jokatzen dute; beraien helburu nagusia etekin ekonomikoa lortzea da, eta hasiera batean supermerkatu bat izan zena, gaur egun produktu anitzeko zentro bihurtu da, aisialdiarekin tartekatuz. Guk ez dugu ez iritzi negatiborik, ezta positiborik ere, baina uste dugu eskaintza nahikoa dagoela gure lurraldean; zentzu horretan, asebeteta gaude.

Dirudienez, zuen elkartean Alde Zaharreko merkataritza sustatzeko ekimenak sustatu dituzue; une honetan, adibidez, Arkeologi Museoarekin lotura duen promozioa; zertan datza?

Oso ideia erakargarria da gure arloarentzat; printzipioz, kultura, merkataritza eta ostalaritzaren arteko lotura sustatu nahi dugu, eta gune publiko-pribatuak kultur aisialdirako gune bihurtu nahi ditugu.
Horren harira, Josune Aristondok, BFAko Kultura diputatuak, segi beharreko urratsak azaldu zizkigun; hain zuzen ere, Arkeologi Museoa bisitatzeko sarrerak gure bezeroen artean banatu behar ditugu, baina %50eko deskontua izango dute, hau da, 1,50 euroren truke museoa bisitatu ahal izango dute.

Elkarteak mota horretako beste ekimen edo ekintza batzuk gauzatu ditu?

Kultura ez ezik, arrazen arteko harremanen garapena ere sustatu nahi dugu, eta horren aldeko apustu argia egiten dugu. Adibidez, 2010eko abenduan Unai Aizpuruk Fundación Bilbao Histórico eratu zuen, La Ribera Merkatua eta Bilbao La Vieja elkartearekin batera. Helburua hiritarrei Bilboko alde historikoa ezagutzera ematea eta merkataritza eta saltokiak suspertzea da.

Diru-laguntzei dagokienez, nahikoa da gobernuek merkataritza txikira bideratzen duten inbertsioa?

Gobernuek ekintzak diruz laguntzen dituzte, baina arazoa ez da hori; krisi garaian hartu behar dituzten neurriak beste mota batekoak dira: enpleguaren inguruko hitzarmenak, gizarte segurantzaren kuotak, enplegatzen duen enpresaburuari babes handiagoa ematea edo bestelako neurri fiskalak enpresak ez itotzeko.
Bestalde, bankuei begira, dirua gehi mozkina jasoko dutela ziurtatzen dutenean baino ez dute egiten apustua, betiko moduan.