Ahultasunak izatekotan edo aditzera ematekotan (informazio hori gordetzea edo ezagutzera ez ematea beti izango da positiboagoa), argi utzi behar da horretan hobetzeko gai izango zarela eta ahalegina egingo dela. Beste faktore garran-tzitsu bat da gainerakoetatik desberdintzea eta eskatzen dena baino gehiago eskaintzeko gai zarela adieraztea. Hala eta guztiz ere, kontu handia izan behar da eta ezin da umiltasuna galdu, harropuzkeriak alde batera utziz.
Janzkera eta jarrera
Kontuan hartzeko beste kontu garrantzitsu bat lehenengo inpresioa da; momentu horrek elkarrizketa osoa markatuko du eta eragina izango du. Orokorrean, presentzia formala izatea izan daiteke gomendagarriena, baina, aldi berean, jarrera zuhurra edo diskretua mantendu behar da.
Janzkerari dagokionez, karguaren araberakoa izango da; bezeroekin aurrez aurre lan egitea edo bulego batean ordenagailuaren aurrean jardutea ez da gauza bera, eta jantzia edo arropa lanpostu batetik bestera desberdina izaten da kasu askotan. Kasu hauetan, garrantzitsuena ez mozorratzea da; beraz, helburua naturala izatea eta jantzitakoarekin eroso sentitzea da.
Jarreraren inguruan, oso inportantea da motibatuta agertzea eta interesa izatea; ez da monologo bat izan behar, noizbehinka hitz egitea edo zure iritzia islatzea ondo egon daiteke, gehiegizkoa izan gabe. Betiere, arreta mantendu behar da eta elkarrizketatzaileak esaten duen guztiari erantzun behar zaio. Azkenik, aurretik izandako lanpostuetako esperientzia deskribatzerakoan, alderdirik positiboenak azpimarratu behar dira, gainerako enpresak gutxietsi gabe. |
