Ekonomia eta Ogasuneko ministro Pedro Solbesek ez du hain argi ikusten bigarren seihilekoan errekuperazio ekonomikoa lortzea; "hilabete gutxian egoera asko alda daiteke, ezin dugu aurreikuspen ziurrik agin", aitortu du ministroak. Aldi berean, Solbesek Barne Produktu Gordinaren (BPG) beherakada mantendu egingo dela dio, %1,6ko jaitsiera izango baita, gutxi gorabehera.
Erakunde Enpresarialen Espainiako Konfederaziokoek (EEEK), aldiz, jarrera ezkorragoa erakusten dute. Horien ustez, 2009an ekonomia ez da hobetuko, eta 2010. urteari dagokionez, "goiz da jakiteko zer pasatuko den urte batean, baina gauzak horrela jarraituz gero, aurrerapausoak ez dira oso handiak izango", diote. Konfederazioaren proposamenak, besteak beste, hurrengo hauek dira: esportazioari laguntza handiagoak ematea, iraizpenak merkatu, eta produkzioan dauden hobespenak soldaten igoerarekin lotzea.
Itunen beharra
Manuel Sanchís i Marcok, Valentziako Unibertsitateko Ekonomia irakasleak, 9 urte edo gehiagoko iraupena iragartzen du, neurri gogorrak hartzen ez badira. Espainiako Estatuaren egoera hobetzeko hitzarmenak behar direla ziurtatu du Sanchísek, zehazki, Moncloako itunak. "Alderdi politikoek neurri fiskalak adostu behar dituzte eta doiketaren kostu politikoak bereganatu. Era berean, ondo legoke giza solaskideek soldatak, produktibitatea eta beste gai batzuk adostea", gomendatu du irakasleak.
Sanchísen ustetan, aipatutako hitzarmenak egin ezean, krisia 2017. urtera arte luza daiteke gutxienez; "itun bat jarraitu gabe ezinezkoa izango litzateke krisi honetatik ateratzea; egoera honek 9 urte gehiago iraun dezake", aurreikusten du ekonomialariak. Iragarpen nahiko ezkorra egiten du irakasleak, estrategia edo hitzarmen bat ez izatekotan. Horrez gain, Manuel Sanchísek egungo ekonomia egoeraren gaineko erreferentzia bat egiten du, 1986-1992 urteetakoarekin alderatuz, Espainia Europar Batasunean sartu zenean.
Bestalde, Francisco González BBVAko presidenteak larritasun nazionalaren egoera azalarazi du. Halaber, bere ustez, egin behar den lana ezinezkoa da alderdi politiko edo Gobernu bakar batek aurrera eramatea; "inoiz baino gehiago elkartuta egon behar dira eta desberdintasun ideologiko guztiak alde batera utzi behar dituzte krisiari behar den moduan aurre egiteko", dio Gonzálezek. Beraz, Sanch’sek dioen bezala, BBVAko
presidenteak pentsatzen du alderdi edo herrialdeen arteko itunak izango liratekeela irtenbiderik argienak.
Gonzálezek ez du uste euro zonaldeko herrialdeak 2010ean baino lehenago suspertuko direnik. "Ekonomiak atzeraldi izugarria jasan du azken hilabete hauetan; egoera berean jarraitzekotan, zenbait entitatek kaudimen arazo larriak pairatuko dituzte", gaineratu zuen BBVAko presidenteak.
Atzeraldi ekonomiko larria
Aditu gehienak ados daude iritzi batean: "Espainiako ekonomia atzeraldi prozesuan sartzen ari da"; hori da, esaterako, Antón Costasen ustea, beste ekonomialari batzuek ere pentsatzen dutena. Costasek (Politika Ekonomikoan katedraduna Bartzelonako Unibertsitatean) krisiaren hasieran gaudela dio, eta egoera oraindik gehiago larrituko dela ziurtatu zuen joan den hilabetean, esanez: "geldialdi ekonomikoa luzea eta mingarria izango da; gainera, langabeziak gora egingo du hurrengo hilabeteetan".
Katedradunak esan duenez, iraganeko krisien iraupenaren batez bestekoa sei hiruhilabetekoa izan da; "kasu honetan, seguruenik gehiago luzatuko da, baina ez naiz beste batzuk bezain ausarta, nahiago dut data finkorik ez eman", azaldu du Costasek. Ausarta hitzarekin Europako Batzordeari (EB) egiten dio erreferentzia; katedradunaren ustez, ekonomiari buruzko aurreikuspen bat egiterakoan, ez da komenigarria datak eta zifrak ematea, hobe da bata ala bestea soilik igortzea. EBkoek krisi finantzarioak sei hiruhileko iraungo duela diote; lehenengo bi hiruhilekoak atzeraldi nabari batean murgilduta, eta hurrengo laurak geldialdi ekonomikoan. Era berean, ausartak izan ziren eta data finko bat eman zuten, susperraldia 2010ean ailegatuko dela ziurtatuz.
