Dena den, José Manuel Pedregalek, Activobankeko negozio zuzendariak, ez du uste oparien ideia txarra denik bezeroentzat, "urte batean 15.000 euro inbertitzen dituen bezero batek nahiago izango du Wii kontsola dohainik izatea, %2ko errentagarritasuna baino", komentatu du Pedregalek.
Banku eta kutxen eskaintzak
Egungo egoeraren ondorioz, entitateek emari deigarri eta harrigarriak eskaintzen dituzte. Betiko kafe-makina, ontziteria, kontsola edo argazki-kamerak ez ezik, beste opari mota batzuk ere eskaintzen dizkigute, banku edo kutxaren arabera. Esaterako, La Caixan biberoiak berotzeko gailua oparitzen dute; edo Caixa Catalunyan kazetari bat bezeroaren esanetara ipintzen dute bere bizitza kontatzeko, Déposito Memorias deritzon promozioan izena emateagatik. Beste eskaintza harrigarri bat izan daiteke Caja Es-pa–an egiten dutena, kasu honetan erretiratuei zuzenduta dagoena, 18 hilabeteko epean 12.000 euro kutxan sartzeagatik eta pentsioa epe horretan ere bertan helbideratzeagatik, bi pertsonarentzako bidaia oparitzen dute Benidormera, lau izarreko hotel batean ostatu eta gosariarekin, eta gastuetarako 200 euro.
Baina bezeroek euren buruari egin behar dieten galdera da: "pena merezi du benetan?". Galdera horri erantzuteko, beharrezkoa da jakitea zein den opari horrek daukan UTB, produktua kontratatu aurretik. Adibidez, BBK-k Depósito Sonríe promozioan %1,01eko interesa eskaintzen zuen, eta Sanyo argazki-kamera bat oparitzen zuen. Emaria lortzeko, aurreztaileak 11.800 euro sartu beharko ditu entitatean 12 hileko epean. Kasu honetan, kamera digitala errentagarria aterako zaigu, %1,01 UTBko interesarekin 119,18 euro irabaziko genituzke, eta kamera horrek merkatuan 180 euroko balioa du.
Dirua diruaren truke
Banestok abian jarritako ekimena (Rafa Nadal kirolariaren irudiarekin) berritzaileena da, edo, gutxienez, Estatu mailan inoiz egin ez den promozioa da. Banku honetako eskaintza bezeroei dirua oparitzean datza, baina soldata edo nomina bertan sartzearen truke. Bezeroaren soldata 1.000 eurotik gorakoa izanez gero, entitate honek 500 euro sartuko ditu ordain-aurreko txartel batean; aldiz, nomina 2.500 eurotik gorakoa izatekotan, 1.000 euro sartuko dituzte. "Bankuetarako nomina beti da produktu izarra, eta gaur egun arrazoi gehiagorekin", aitortu du Banestoko presidente Ana Patricia Botínek.
Alabaina, ekimen honetan parte hartu ahal izateko, beharrezkoa da hiru ordainagiri helbideratzea. Kanpaina honetan, bankuak 100 eta 150 milioi euro artean banatzea aurreikusten du; horrekin batera, 200.000 nomina berri erakarriko dituzte, eta bezeroen kopurua %48 igoko da, iragarpenak betetzekotan.
