Euskadiko enpresek sortzen dituzten ekimenak edo proiektuak gero eta gehiago ezagutzera ematen dira atzerrian, baina ibilbidea ez da batere erraza, eta kanpoan lanak aurkezteko edo arrakasta izateko diru-laguntzak behar dira; kasu honetan, Eusko Jaurlaritzak hainbat programa abiarazi ditu nazioartekotasuna bultzatzeko xedearekin.

Eusko Jaurlaritzako Industria, Berrikuntza, Merkataritza eta Turismo Saileko Nazioartekotasunaren Zuzendaritzak edozein motatako enpresei laguntza eskaintzeko zerbitzuak eta programak abiarazi ditu azken urteetan, batez ere, ETEei bideratuta daudenak, euren lehiakortasuna sustatzeko eta kanpoko jarduera bultzatzeko helburuarekin.

Euskadiko ETEen garrantzia

Ildo berari jarraituz, Jaurlaritzako Sailak eta SPRIk Euskadiko ETEek atzerrian duten presentzia sustatu nahi dute euren programen bidez; era berean, horrekin batera, nazioartean jada arrakasta izan duten Euskadiko enpresen esperientzia eta egoera mantendu nahi dute.

Hori dela eta, aurten aurkeztutako programa instituzional guztiek sektore guztietako laguntzak eskaintzen ditu; hala ere, zerbitzuen sektoreak gainerakoek baino garrantzi handiagoa hartuko du, bereziki, aholkularitza eta ingeniaritza azpisektoreak, balio erantsi altuagoa baitute.

Merkatu geografikoei dagokienez, toki edo lurralde berriak konkistatu edo eskuratuko direla aitortu dute Jaurlaritzako ordezkariek, gehienbat gaur egun garapen teknologikoaren arloan gorakada izugarria izan duten herrialdeei begira. Hau da, nazioartekotasuna ez da soilik betiko lurraldeetan zentratuko, baizik eta baita aukera berriak eskaintzen duten merkatu eta sailetan ere.

Profesionalak eratzeko bekak

Eusko Jaurlaritzaren beste helburuetako bat lankidetza sustatzea da. Horrekin, profesionalen edo ikasleen prestakuntza eta esperientzia handitzea lortu nahi du. Jaurlaritzak hartutako ildorik esanguratsuena beken eskaintza izan da; horri esker, langile edo ikasle askok atzerrian erabiltzen dituzten metodoak edo tresnak gertutik ezagutzeko aukera izaten dute, gerora Euskadiko enpresetan ibilbide bera jarraitzeko edo antzeko tresnak txertatzeko.

2010eko Nazioartekotasunaren eta Tituludun Atzerritarren inguruko Beken deialdiak itxi egin dira jada. Jaurlaritzak eskaintzen dituen programak edo bekak oso erakargarriak izan ohi dira enpresentzat, diru-laguntzak 500.000 eurora iritsi daitezke eta; diru kopuru hori proiektuetara edo kontratuetara bideratu behar da.

Enpresen nazioartekotasun maila igotzeko, Eusko Jaurlaritzarekin batera Euskadiko Merkataritza Ganberek ere hainbat programatan parte hartzen dute.