Azken eguneratzea: 2010eko apirila-ekaina
ERREPORTAJEA

Ikerketen arabera EAEko irtenbidea
Estatutik aldentzea izan liteke

Egoera ekonomikoaren ondorioz Grezian sortutako liskarra eta iskanbila ikusi ostean, Europako Batzordeak neurri gogorrak jartzea erabaki du. Kasu honetan, neurri horiek Espainiako Gobernuak ezarri ditu, EBko presioaren eraginez. Gauzak horrela, Zapatero presidentearen erabakiak ez dira ondo hartuak izan esparru eta talde askotan; gainera, Patxi Lopezek Euskadin neurri horiek jarraituko ditu

 

Krisia dela eta, gero eta herrialde gehiago dabiltza neurri zorrotzak eta gordinak hartzen, batez ere, Greziako egoera errepika ez dadin. Horretarako, lurralde bakoitzeko mandatariek gastuak murriztu beharra ikusi dute; hortaz, arazoa konpontzeko eta krisialdi ekonomikoari aurre egiteko gastuak errotik mozteko eskatu diete Europako herrialdeei. Hau da, Europako Batasunak onartutako erreskate planak ez dituenez konpontzen arazoaren muina, herrialdeen gehiegizko defizita eta zor publikoa, herrialdeek gehiago zorpetu beharko dute.

Ildo berari jarraituz, Europar Batzordeak hobetu egin nahi du euroguneko herrialdeen politika ekonomikoen koordinazioa eta kontrola.

"Soluziobidea: Estatutik aldendu"

Standard & Poor agentziak euskal ratingaren inguruko azterketa egin du, eta emaitzak positiboak izan dira Euskadirako, baina ez hainbeste Estatuko ekonomiarako. Azken batean, ikerketaren ondorioetako bat zen komenigarria izango litzatekeela Euskadiko ekonomia Estatuko sistematik aldentzea. "Euskadiko egoera ekonomikoak hobera egin dezake, Espainiako Estatuan inposatuta dauden sistema eta erregimenetik bereiziko balitz", epaitu zuen agentziak bere ikerketan.

Datuak eman ostean, EAJ alderdi politikoak bere lehenengo adierazpenak egin zituen gaiari buruz, eta, hain zuzen ere, Joseba Egibar EAJko Gipuzkoa Buru Batzarreko presidenteak hauxe esan zuen: "guk ekoizten dugunaren herena Espainian saltzen dugu, beste herena hemen eta gainontzekoa nazioartean. Beraz, Espainian saltzen dugun heren hori nazioartean saldu beharko dugu, merkatu askoz gogorragoa delako eta onuragarria izan daitekeelako". PP eta PSEko ordezkariek ez zituzten ondo hartu bere adierazpenak eta bi bandoen arteko liskarrari hasiera eman zioten. Dena den, PP eta PSEkoek ez zuten kontuan izan Egibarren adierazpenak Standard & Poor agentziak emandako datuetan oinarritu zirela.

 

EBren egoera ezegonkorra

EBko herrialdeen artean, argi dago Grezia dela egoerarik larrienean dagoen herrialdea, baina kontuan hartu behar da bere atzetik Espainia, Portugal, Irlanda eta Italia daudela. Zerrendatutako lehenengo biek, gehienbat, murrizketa gehiago eta egiturazko aldaketak behar dituzte, eta beren mandatariek, batez ere, lan merkatuan eta pentsioetan sartu dute eskua.

Hala eta guztiz ere, Frantziak ere aurrekontuak egonkortzeko neurriak hartu behar dituela esan du Olli Rehn Europako Gai Ekonomikoetarako eta Diru-gaietarako komisarioak.

Oro har, Europar Batzordearen helburua euroguneko herrialdeen politika ekonomikoen koordinazioa eta kontrola hobetzea da. Artikuluaren hasieran aipatzen genuen moduan, itunaren arabera, herrialdeek %3koa baino defizit txikiagoari eutsi behar diote.
   

Estatuan hartutako neurrien eragina Jaurlaritzan

 

Patxi Lopez lehendakariak Espainian hartutako neurriak EAEn errepikatuko direla jakinarazi du; Jaurlaritzak aurten funtzionarioen itun kolektiboak berritu arren, hau da, %0,3 igo dizkie aurten eta 2010eko KPIren pare igoko dizkie 2011n.

Beraz, Euskadiko funtzionarioen soldata ere %5ean murriztuko dute, beste neurri batzuen artean, farmazia gastuak murrizteko plana eta udaletxe eta erkidegoen aurrezpen plan orokorra, besteak beste. Hain zuzen ere, Euskal Herrian, guztira, 143.564 funtzionario publiko daude.

Lopezen aburuz "soldaten eta pentsioen murrizketak ez du esan nahi ahulenen kontra jotzea". Gainera, errenta altuena dutenei zergak igotzea aztertzeko presta agertu da, baina kapital handiei 'presio' eginez gero nahi duten tokira joan daitezkeela ohartarazi du Lehendakariak.

Bestalde, Idoia Mendiak, Eusko Jaurlaritzako Justizia eta Herri Administrazioko sailburuak, Euskadin neurriak hartu baino aste bat lehenago adierazi zuen "Euskadin gauzak ondo" egin direla eta ekonomia sendoa duela; halere, Jaurlaritzak Espainian hartutako neurri horiek ere hartzea erabaki du.

Sindikatuen mugimenduak

Talde sindikalen artean ez da adostasun osoa lortu eta funtzionarioen soldaten jaitsieraren aurka altxatzeko modu eta egun desberdinak erabaki dituzte.

Alde batetik, UGT, CCOO eta CSIF Espainiako sindikatuek adierazi dute auzitegira joko dutela sektore publikoko langileei ezarri nahi zaien soldata murrizketagatik, "Konstituzioaren aurkakoa baita", gaineratu dute aipatutako sindikatuen ordezkariek.

Beraz, UGTk, CCOOk eta CSIFek sektore publikorako greba deialdia ekainaren 8an egingo dute, funtzionarioek ekainetik aurrera gutxienez %5eko jaitsiera izan ez dezaten. Modu berean, EAEko hiru sindikatuek ere greba deialdia aurkeztu dute Bilbon.

Bestalde, ELA, LAB, ESK, EILAS, EHNE eta Hiruk osatutako euskal gehiengo sindikalak maiatzaren 25erako antolatu zuten sektore publikorako greba deialdia.


 
Itzuli
 
 

 

  
logo
 
DFB GB-POL-LING KULTURA SAILAK
(KULTURA SAILA HIZKUNTZA
POLITIKARAKO SAIBURUORDETZA)
DIRUZ LAGUNDUTAKOA		 logo leizaola

 

HASIERA · ALBISTEGIA · ELKARRIZKETAK · ERREPORTAJEAK · I+G+i · TEKNOLOGIA · AISIALDIA · LAN ESKAINTZAK