Euskal Herriko biztanleok gero eta mesfidatiago bihurtzen ari gara; gehienbat, hau guztia krisialdiaren hazkundearekin hasi zen, hots, euskal kontsumitzaileen mesfidantzak gora egin du egoera ekonomikoa hazi den heinean. Dena dela, egoera horrek bere alde positiboa ere badu: dirua aurrezteko dohaina azaleratu da eta, adituen ustez, hori onuragarria izan daiteke gizartearen etorkizunerako.

Krisiari dagokionez, euskaldunok gehien arduratzen gaituen gaia langabeziarena da; izan ere, aurtengo lehenengo hiruhilekoan, berriz ere egin du gora, 2009ko azken hiruhilekoarekin konparatuta, behintzat. Ondorio hauetara ailegatu den taldea Euskadiko eta Nafarroako Aurrezki Kutxen Federazioa izan da, Kontsumitzailea­ren Koiuntura-Inkestaren bidez. Txosten horretan, argi ikusten da euskal kontsumitzaileen konfiantzak hamabi puntu egin duela behera aurtengo lehen hiruhilekoan, aurreko datuekin konparatuta.

BBK, Kutxa, Caja Vital eta CAN izan dira inkesta edo txostena egin duten entitateak; hain zuzen ere, erakunde horiek dira aurrez izendatutako Federazioa osatzen duten taldeak.

Kontsumitzaileen konfiantzaren gorabeherak

Lehen esan bezala, aurtengo aurreneko hiruhilekoan, euskal kontsumitzaileen konfiantza-indizea 81 puntutan kokatu da. Horrek esan nahi du hamabi puntuko uzkurdura izan duela aurreko hiruhilekoarekin alderatuz.

Gauzak horrela, Euskal Herriko indizea Espainiako eta EBko datuetatik (84 eta 87, hurrenez hurren) nahiko hurbil dago. Emaitzetan, orokorrean, atzerantz egin arren, ikus daiteke euskal kontsumitzaileen konfiantza-indizeak susperraldirako joera arinari eusten diola.

Hala ere, neurri txikiagoan, euskal kontsumitzaileek etorkizunean aurrezteko izango duten gaitasunari dagokionez, atzera egin dute (9 puntu, hain zuzen ere).

Aldiz, ekonomia orokorraren kasuan, langabeziari eta etxeko ekonomiari buruzko itxaropenei dagozkien adierazleek susperraldi-joera arin horri eutsi diote, indize orokorrak bezala.

Europaren ikuspuntua

Europako Batzordeak %0,7 berretsi du euroguneko BPGren hazkunde-aurreikuspen moduan 2010. urterako, eta datu horrek alde nabarmenak erakusten ditu herrialde kideen artean: herrialde horietako batzuek, eta Espainia horien artean dago, hazkunde-tasa negatiboak iragarri dituzte. Informazio horiek eragin garrantzitsua izan dute euskal kontsumitzaileek ekonomia orokorraren eta, beraz, langabeziaren eboluzioari buruz duten ikuspuntuan.

Bestalde, inbertsio handiak egiteko probabilitate-indizeak eta aurreneko etxebizitzaren eta automobilaren azpi-osagaiek atzera egin dute berriro ere.

Izan ere, EAEko Lurralde Historikoen arabera, kontsumitzaileen konfiantza 77 puntukoa da Araban, eta 82koa, berriz, Gipuzkoa eta Bizkaian. Azken hiruhilekoetan lortutako datuak hobetu egin dira kasu guztietan. Ildo berari jarraituz, hiru lurraldeetan, kontsumitzaileek euren etxeko ekonomiaz duten pertzepzio hobeak eta aurrezteko itxaropenei eusteak ekarri du hobekuntza hori, egoera ekonomiko orokorraren eta enpleguaren suspertzeari buruz dagoen itxaropen negatiboa konpentsatuz.

Ibilgailuen salmentak

2010. urteko lehen hiruhilekoan, ibilgailuak eskuratzeari dagokion igurikimena oso maila apalean mantentzen da; gainera, atzera egin du berriz 2009ko azken hiruhilekoan aurrera egindakoaren maila berean. Laguntza-neurri publikoak eraginkorrak suertatu dira epe laburrean, baina ez dago batere argi etorkizunean mantenduko diren ala ez.

Joan den urtean, guztira 44.012 ibilgailu matrikulatu ziren Euskadin, 2008an baino %1,8 gehiago. Gehienbat, iazko azken hilabeteetako joera-aldaketak ekarri du 2009ko urteko emaitza positiboa. Estatu mailan, ordea, hilabete horietan jasandako hobekuntza ez da nahikoa izan, eta joan den urtean matrikulazioek %17,8ko beherakada izan zuten.

Aurtengo lehenengo hilabeteei dagokienez, urtarrileko eta otsaileko hilabeteetan hain zuzen ere, matrikulazioa 6.847 ibilgailukoa izan da EAEn. Hortaz, gorakada %32,9koa izan da iazko hilabete berarekin alderatuz gero, baina %27,6ko beherakada izan da 2008ko datuekin konparatuta. Txostenean nabarmentzen dute laguntza publikoek gai honetan izandako eragina, positiboa betiere.

Merkatu txikiaren eta handiaren arteko aldea

Salmenten gaiari lotuta, azalera handien salmenta-indizeak urte arteko hazkunde positiboa erakusten du abenduan eta urtarrilean; 2009an, oro har, balio negatiboak izan zituen.

Eta, azkenik, nahiz eta txikizkako merkataritzaren indizeak beherakadari eutsi, urte arteko aldaketa-tasa negatiboa izan da, %1,5ekoa hain zuzen ere, baina aurrekoak baino txikiagoa.