.Irudi desitxuratua

Ekintzailetzaren ideiaren inguruan irudi faltsua sortu da, eta ezohiko zenbait kasu eredutzat hartu dira, ekintzaile arrakastatsuaren irudia heroien pare jarriz. Ildo berean, hainbat mito sortu dira, esaterako, ekintzailetza gazte izatearekin uztartzea, edota pentsatu izan da ideia handiak izan behar direla arrakasta lortzeko. Sarritan, pentsatu ohi da ekintzailea pertsona independentea dela, zeinak arrakasta lortu baitu berak bakarrik egindako ahaleginari esker. Izan ere, elkarlanaren eta ekintzaileen arteko lankidetzaren bidez sortzen dira negozio eredu arrakastatsu berriak.
Hortaz, krisiak astindu ederra eman die mundu osoko sistema ekonomikoei. Krisiaren eraginez, murriztu egin dira enpresen mantenuarekin lotutako gastuak, eta gaur egun enpresetan prestakuntza eta talentu handiko langileak ari dira lanean.

Ekintzailetzaren prozesuak

Enpresa berritzailea sortzeko orduan prozesu bat gauzatu behar da, baina, lehenengo eta behin, dirua beharrezkoa da, eta, horretarako, laguntzak eskaintzen dira instituzio edo elkarte desberdinetan. Laguntza integralei dagokienez, aurretik adierazitako Ekintzaile eta Barnekintzaile programak dira horietako bi; horien helburua da enpresa-ekimen berritzaileen sorrera sustatzea.

Hain zuzen ere, joan den urtean 79 enpresa sortu ziren guztira laguntza honi esker. Bestalde, proiektuen %83 enpresa bihurtzen dira, eta sortutako enpresen %74k 42 hilabete irauten du gutxienez, hau da, plan hauekin emaitza onak lortzen dira oro har.

Ekintzailetza prestakuntzaren bitartez bultzatzearen kasuan, 2009an hainbat programa gauzatu ziren; esaterako Entreprenari programa, Euskadiko unibertsitateetan oinarri teknologikoko enpresak sortzeari eta ekintzaileei sustapena, aholkularitza eta laguntza emateko. Beraz, unibertsitateko irakasleen, ikertzaileen, bekadunen eta ikasleen gogo ekintzailea sustatzen da. Horrez gain, proiektuak heltzeko eta merkaturatzeko prozesuan laguntzen da.

Joan den urteko emaitzei begira, Entreprenari programara 1.573 pertsona jo zuten, 31 enpresa-proiektu berri jaso ziren, eta oinarri teknologikoko edo berritzaileko 13 enpresa berri sortu ziren.

Azkenik, kultura ekintzailearen sustapenari dagokionez, Eusko Jaurlaritzak ekonomikoki babestu ditu 2009an Pertsona Ekintzailearen Eguneko ekitaldiak, tokiko eta eskualdeko 20 garapen-agentziak eta Garapen elkarteak antolatutakoak. Guztira 57 ekintza egin ziren, eta zuzenean 2.415 pertsonak parte hartu zuten.