Eusko Jaurlaritzak
12 milioi euro baino gehiago erabiliko ditu
enpresa publiko eta pribatuetan, elkarteetan
eta toki erakundeetan euskararen erabilera
bultzatu eta sustatzeko. Hala eta guztiz
ere, zifra horrek, iaz bideratutakoarekin
alderatuta, 410.000 euroko murrizketa izan
du. Halaber, Lourdes Auzmendi Jaurlaritzako
Hizkuntza Politikarako sailburuordeak esan
du krisi ekonomikoaren egoerak eragina izan
duela aurrekontuaren murrizketan.
Horrez gain, Auzmedik azaldu du berrikuntzak
izango direla diru-laguntzen ordainketan
eta programa desberdinetako (“Lanhitz”,
“Euskalgintza”, “IKT”,
e.a.) deialdietara aurkezten diren proiektuen
puntuazioan.
Nahiz eta deialdi gehienek iazko diru kopuruak
mantendu, Jaurlaritzak 510.000 euro kendu
ditu Lanhitz deialditik, iazko 2,7 milioi
eurotik aurtengo 2,2 milioi eurora murriztuz.
Hain zuzen ere, joan den ekitaldian, Lanhitz
programaren baitan, Jaurlaritzak ez zuen
aurrekontu-sail osoa banatu, 175 enpresa
eta 46.684 langile diruz lagundu ondoren,
deialdia 200.000 eurorekin bukatu baitzuen.
Enpresetan
euskara txertatzea
Orokorrean,
enpresei mota hauetako diru-laguntzak ematearen
helburu nagusiak hurrengo biak dira: alde
batetik, euskararen erabilera plan berriak
ezartzea, eta, bestetik, laguntzak jasotzen
dituzten enpresek 2010erako kudeaketa plan
bat egitea. Gainera, 'Bikain' Euskararen
Kalitate Ziurtagiria lortzen duten eta deialdiaren
baldintzak betetzen dituzten erakundeek
laguntza osagarriak jasoko dituzte.
Ildo berari eutsiz, euskara enpresetan txertatzeko
arrazoiei dagokienez, lehenengo urratsa
edo helburua merkatu berriak bereganatzean
datza, hau da, produktuak euskaraz eskaintzen
dituzten enpresak bezeroarengandik hurbilago
daude.
Dena dela, kalitateari begira, euskara,
beste edozein hizkuntza bezala, baliagarria
da lan mundurako, euskaraz lan egiten duten
erreferentziazko hainbat enpresa baitaude:
CAF, Fagor, Euskadiko Kutxa, e.a. Pisu handiko
beste arrazoi batzuk garapena eta komunikazioa
dira: lehenengoaren kasuan, hizkuntza maila
hobetzen duen langileak garapen profesionalean
aurrerapausoak ematen dituelako; aitzitik,
komunikazioari dagokionez, behargin euskaldunek
lantokian euskaraz egiteko aukera badute,
erosoago sentituko dira, eta, era berean,
hizkuntza eskubideak bermatzen dira.
Esan beharra dago Lanhitz programaren xedea
enpresa publiko eta pribatuetako langileen
artean euskara sustatzea dela.
|
