Euskal Autonomia Erkidegoan hainbat manifestazio eta greba egin dira azken urtean, batez ere krisialdi ekonomikoaren eraginez, eta, horren ondorioz, erakunde publikoek ezarritako neurrien aurka egin dute.

Duela urtebete, Gobernu zentralak krisiari aurre egiteko neurri eta erabaki berriak ezagutzera eman zituen; horren ondorioz, sindikatu gehienak eta langile talde asko erabaki horien aurka altxatu ziren, mobilizazio eta greba asko antolatuz.

Ildo berari jarraituz, azken manifestazioen artean, Maiatzaren Lehenean egindakoa dugu, hain zuzen ere, langilearen egunean egindakoa. Euskadiko zenbait sindikatu beste behin bildu ziren, langileriaren egoera hobetzeko xedearekin, EAEko hiri eta lurralde ugaritan.

Sindikatu abertzaleen jarrera

Horren harira, ELA, LAB, STEE, EHNE eta HIRU sindikatuek Bilbon ospatu dute Maiatzaren Lehena, manifestazio handi eta bateratu batekin. 2004tik, lehen aldiz ospatu dute elkarrekin, eta milaka lagun elkartu dira beste eredu ekonomiko eta sozial bat eskatuz. Hitzorduak sindikatu abertzaleak batu ditu zazpi urte geroago.

Adolfo Muñoz ELAren idazkari nagusiak hitzaldian esan duenez, “onartutako neurri guztiek lanaren eta elkartasunaren kontra egiten dute, eta ez ditugu Gobernuak sinetsi behar, gezurretan ari baitira”. ELAren ustez, krisia, ekonomiarena ez ezik, politika eta demokraziarena ere bada.

Bestalde, Ainhoa Etxaide LABeko idazkari nagusiaren aburuz, krisiari aurre egiteko, “beste eredu ekonomiko eta sozial bat ezarri behar da, eta, gaur egun, aukera hori gero eta garbiagoa eta beharrezkoagoa da”.

LABen arabera, beste politika batzuk egin daitezke; “gainera, Euskal Herrian bada horren alde egiten ari den gehiengo soziala, hiru greba orokor egin baititugu”, gaineratu du Etxaidek.

Oro har, LABek emandako datuen arabera, Maiatzaren Lehena zela-eta, Euskadiko gehiengo sindikalaren deialdiari jarraituz, 15.000 langile mobilizatu ziren Bilboko kaleetan.

Politiken aldaketa aldarrikatu

Dena dela, sindikatu abertzaleak ez dira izan politiken aldaketa eskatu duten talde bakarra, izan ere, Euskadiko CCOO eta UGT sindikatuek ere aldarrikapen berbera egin dute Bilbon Maiatzaren Lehenean. Bertan, zerga-politikak aldatzea eta politika sozialak bermatzea eskatu dute, besteak beste.

Unai Sordo Euskadiko CCOOren idazkari nagusiaren esanetan, aurtengo Langilearen Eguna, bere sindikatuarentzat, aldarrikatzeko eguna izan da. Bere aldetik, Dámaso Casado Euskadiko UGTren idazkari nagusiak Maiatzaren Lehenaren izaera “jai eta aldarrikapen egun batena” dela adierazi du.