Ekonomiaren KZren webgunea

I+G+i ALBISTEAK

Gipuzkoako proiektu berritzailerik
onenak saritzeko ekimena

Gipuzkoan berrikuntza sustatzen duen 'Gipuzkoa Berritzen' erakundeak lehiaketa deitu du aurten bigarren aldiz jarraian; 40.000 eurorekin sarituko du Gipuzkoako proiektu berritzailerik onena. Proiektuaren izena 'The Ten Milion Project' da.

Gauzatuko den ekintza honek egingarri diren eta beren kabuz iraun dezaketen proiektuak hartuko ditu kontuan batez ere: enplegua sortzeko eragin positiboa dutenak, behar besteko tamainakoak, hainbat erakunde eta pertsona-talderen parte-hartzea sustatzen dutenak.

Ildo berari jarraituz, ekimenak ekonomiaren eta gizarte-eragileen artean sormenaren eta berrikuntzaren aitortza edo ezagutza publikoa bultzatu nahi du, Gipuzkoan pentsaera berritzailea sustatzeko, beste helburu batzuen artean.

Sari honetara edozein ideia berritzaile aurkez daiteke, enpresa, unibertsitate, zentro teknologiko edota pertsona fisikoek sortutakoak.

Gipuzkoa: lurralde berritzailea

Ekimenaren xedea "Gipuzkoa lurralde berritzailea bihurtzea da"; hori adierazi du Juan Mari Uzkudunek, Gipuzkoa Berritzen-en presidenteak. "Helburuetako bat, era berean, berrikuntzarako bereziki egokia izango den ingurunea sortzea da", gaineratu du presidenteak. Hori, Gipuzkoaren lehiarako abantailaren funtsezko elementua izan dadin.

Proiektuan 210 pertsonak baino gehiagok parte hartzen dute; horien artean: %48 enpresak dira, %9 Zentro Teknologikoak, %13 unibertsitate eta heziketa-zentroak, %9 Herri Administrazioak eta %13 bestelakoak.

Ekimen hau Gipuzkoako Foru Aldundiko Berrikuntza eta Ezagutzaren Gizarterako Departamentuak eta Innobasquek bultzatu eta laguntzen dute, eta, parte-hartze eta konpromiso zabalaren bidez, Gipuzkoan pentsamendu berritzailea sustatzea dute helburu.

62 gaztek jaso dituzte Iñaki Goenaga Fundazioaren bekak

Iñaki Goenaga Zentro Teknologikoen Fundazioaren (IG-ZTF) 2009ko Bekak banatu edo eman dira, eta, zehazki, 62 gaztek jaso dituzte laguntza horiek. Ekitaldian honakoak izan dira: Eusko Jaurlaritzako Teknologia zuzendaria, Edorta Larrauri; Jaurlaritzako Zientzia Politikarako zuzendaria, Begoña Ochoa; eta Zentro Teknologikoen Fundazioko presidentea, Alex Bengoa.

Ekitaldiaren izenburua 'Imagine, Create, Innovate: Zu izatea nahi dugu' izan da; horrela, pertsonek zientzia, teknologia eta berrikuntzaren garapenean duten balioa azpimarratu nahi dute.

Beken helburuak

Etorkizunean zenbait proiektu edo asmakuntza eraiki edo sortuko dira, hots, sistema ekonomikoa irauliko du norbaitek, eredu orekatuago batekin; esaterako: bularreko minbiziaren aurkako txertoaren garapena edota eguzki-energiak bultzaturiko hegazkinen diseinua.

Horregatik, Fundazioaren Prestakuntza Programen xedea gazteen talentuaren aldeko apustua egitea da, "hori baita gure Herriaren baliabide nagusia", adierazi dute Iñaki Goenaga Fundazioko arduradunek. Guztira, egin dituzten 30 deialdietan, 4.300 beka eman dituzte, lizentziadun berri askori prestakuntza zabaltzea eta gero lan-munduan sartzea ahalbidetuz.

Hasieratik, beka-programa hauek Eusko Jaurlaritzako Industria Sailaren babesa izan dute, eta horrek jarri izan ditu funts publikoak Ikerketa Generikoko proiektuetan sartutako bekak finantzatzeko.

Sei euskal enpresa kokatu dira EBko indartsuenen artean

I+G delakoan eta teknologian adituak diren enpresak gero eta garrantzi handiagoa hartzen ari dira edozein merkatutan, eta etorkizunari begira lehiakortasun handia bermatzen dute. Hori guztia oso argi dute Euskadiko enpresek, eta, hori dela eta, Europako sendoenen artean daude.

Joan den hilabetean argitaratutako ikerketaren arabera, I+G delakoarekin lotura duten Europar Batasuneko mila enpresarik sendoenen artean sei euskal enpresa daude, joan den urtean baino talde bat gehiago, CAF gipuzkoarrari esker. Enpresa horien guztien artean, 228,66 milioi euro inbertitu zituzten proiektu berritzaileetan, hau da, 2007an baino %27 gehiago.

Euskal enpresen posizioa

Euskadiko enpresen kasuan, Iberdrola lehenengo postuan dago, eta ITP hirugarren posizioan. Bi talde horien artean Fagor dago, 56 milioi euro gastatu baititu azken urtean (Estatuan 8. postuan dago, eta Europan, berriz, 267.ean).

I+Grekin konpromiso garbia hartu duen beste enpresa bat Gamesa da; parke eolikoen eraikuntzan aditua den talde honek 32 milioi euro baino pixka bat gehiago gastatu ditu, hau da, 2007an baino %3,7 gehiago. Hala eta guztiz ere, Estatuko enpresen artean 11. postuan dago (345. lekuan, EBn).

Bestalde, CIE Automotivek gorakada handia izan du; 11,5 milioi gastatu ditu, hots, 2007an baino %100 baino gehiago. Azkenik, lehen azaldu bezala, CAF aurten estreinatu da ranking honetan; talde honek izandako igoera handienetarikoena izan da, %650ekoa, hain zuzen ere.

BESTE I+G+i ALBISTEAK