Gaiker-IK4k laborategi eta ekipamendu
berriak inauguratu ditu

Erakundearen barruko loturei ahalik eta etekin handiena ateratzeko eta balio handiko garapen teknologikoak lortzeko helburuarekin, hainbat diziplinatako teknologiak batu ditu Gaiker-IK4 zentro teknologikoak; horretarako, zortzi laborategi eraiki eta egokitu ditu. Hori guztia ez ezik, abangoardiazko ikerketa-ekipamenduak ere erosi ditu, nanoteknologia, bioteknologia eta material plastikoen teknologiak elkartzeko asmoz. Horrez gain, suaren laborategi berri bat ireki du Gaiker-IK4k bere zentroan. Eraikuntzaren eta garraioaren sektoreetarako suaren aurreko erreakzioaren entseguak egiteko, Europako araudiari jarraitu diote, laborategia sortzerakoan.

Teknologia batu

Inauguratu berri dituzten laborategien bidez, zentro teknologikoak aurrerapauso bat eman du teknologia-espezializazioan, bere jakintza-arloetako teknologiak batzeko apustua egin baitu: bioteknologia, ingurumena eta birziklapena eta plastikoak eta konpositeak.

Hain zuzen ere, 2.165.000 milioi euro inbertitu dituzte guztira erronka berri horretan.

Materialak nanoteknologiarekin eta bioteknologiekin konbinatuta, gaur egun zenbait egunetan egin ohi diren diagnostikoak minutu gutxi batzuetan egiteko biosentsoreak garatzen ari dira. Biosentsore horiekin, gainera, ez da beharrezkoa izango espezializatutako pertsonaren esku-hartzerik.

Arabak industria garatzeko operazio berria du abian. Foronda inguruko parke aeronautikoa garatzeko hitzarmena sinatu ondoren beste hitzarmen bat sinatuko da eremu horretan industrialde bat sustatzeko, 460.827 metro karratuko lurzorua. Guztira, 26 milioi euro inbertitzea aurreikusi da.

Hitzarmen honen bitartez, bertan parte hartzen duten erakundeen interesa gauzatu nahi da. Helburua VIAP -Vitoria Industrial Air Park- delakotik hurbil dagoen erabilera industrialeko jarduera bat egitea da. Azpiegitura industrial berri honek sinergiak indartu eta ekonomia suspertzea du xede. Horretarako, bada, sektore aeronautikoari eta aeroelikagaien garraio sektoreari loturiko jarduerek sortutako eta erakarritako ekimen berriak pentsatu dira.

Subillabide

Forondako Aireportua, Jundizko Intermodala eta VIAP barne hartzen dituen proiektuari, orain, Subillabide izenekoa gehituko zaio.

Hitzarmen hau, gainera, Lehiakortasun-Estrategia Europa 2020 Planak proiektatutako estrategien jardueren baitan sartzen da. Plan horren arabera, ekonomia lehiakor eta dinamikoak garatu nahi dira, esportatzaileak eta lankidetza publiko-pribatukoak, konektatuak eta Europari irekita egongo direnak.

Subillabide II-k Jundizko industrialdearen mendebaldea eta Subillabide I lotzea dakar. Ondorioz, enpresen eskura jartzen ditu zoru industrialeko milioi erdi metro koadro, kokaleku estrategiko eta pribilegiatuan.

Neiker-Tecnaliak patata erabiliko du tresna moduan