Lankidetza GESTAMPekin

CENIT egitasmoaren barnean, ADAPTA ibilgailuen babesa hobetzeko sortu da. TECNALIA GESTAMPekin batera ari da ikerketa horiek egiten. Ibilgailuentzako osagaiak eta euskarri metalikoak garatzen eta fabrikatzen dituen nazioarteko taldea da GESTAMP. Munduko 17 herrialdetan dago presente, eta, guztira, 11.750 lagunek baino gehiagok lan egiten dute taldean.

Nafarroako esnearen AFM1 toxina-kantitatea
ez da kezkagarria

Urtebete iraun duen ikerketaren ondorioz, Nafarroako esneak AFM1 toxina naturalaren kantitate esanguratsuak ez dituela ondorioztatu du Nafarroako Unibertsitateko Zientzien Fakultateak. Nafarroako Foru Erkidegoko 40 ustiategi aztertu eta gero, aztertutako esnearen AFM1 toxina-kantitatea "kezkagarria" ez dela adierazi du Ester Gómez Arranz kimikariak.

Toxina horrek batez ere esne gordinean nahiz haur jaioberrientzako zenbait formulatan izan lezakeen eraginaren azterketan oinarritu da Kimika eta Edafologia sailean egindako lana.

"Haur jaioberrien formulazio horiek araudi zorrotza dute, eta maila baxuenak eman zituzten aztertutako guztien artean", azpimarratu du Ester Gómezek. Jogurtak, esneki funtzionalak, gatzatuak eta abarrak ere esnekien talde segurua dira, toxina horren edukiari dagokionez.

Gibeleko tumoreekin erlazionatuta

Azterketaren arduradunek toxina hori atzematearen "garrantziaz" ohartu dute, gibeleko tumoreen garapenarekin zerikusia omen baitu. "Horregatik, toxinaren kontzentrazio maximoak arautu zituen Europako Batasunak", adierazi dute ikertzaileek. Nafarroako Unibertsitateko ikertzaile talde honen arabera, kutsatutako esnea kontsumitzailearengana iritsiz gero ere, substantzia kaltegarria kontzentrazio-maila seguruen barnean dago, egindako ikerketek erakutsi dutenez. AFM1 substantzia animaliek AFB1 toxinaz kutsatutako pentsuak jatearen ondorioz beren metabolismoetan sortzen duten toxina da.

Ia 50.000 euro musika atonalaren ulerkuntza eta sustapenerako

Musika atonala hobeto ulertzen eta hedatzen lagunduko duen azterlana hiru urtez garatzeko diru-laguntza lortu du Nafarroako Unibertsitate Publikoak. Espainiar Estatuko Gobernuko Zientzia eta Berrikuntza Ministerioak bideratutako 49.610 euroko finantzaketaren bidez musika-pertzepzioa ebaluatzeko eta garatzeko taldeak "Entzumena, ezagupena eta emozioa goi-mailako musika-ikasleek musika atonala interpretatzean" izenburuko egitasmoa garatuko du.

Azterlana, 12 kontserbatoriotan

Goi-mailako kontserbatorioetan musika atonalari buruzko azterlana sustatzea litzateke ikerlan honen xedea, Nafarroako Unibertsitate Publikoko Musika Saileko arduradunen aburuz; "musika atonala urrundu egiten da tonu-sistemak ezarritako arauetatik" eta "XX. mendearen hasieran hasi zen garatzen", musika-diskurtsoaren bilakaera gisa, hain zuzen ere. Helburua betetzeko, espainiar Estatuko goi-mailako 12 kontserbatoriotan egingo da azterlana, "Musika-interpretazioa" espezialitatea ikasten ari diren 80 ikaslerekin. Informatika-programa zehatzen bitartez, grabatutako informazioaren azterketa psikoakustikoa egingo da, eta, ondoren, bildutako informazio hori aztertu egingo dute. Musika atonalak zailtasun ugari ditu gaur egun ganbera kontzertuetan garatu ahal izateko, eta azterlan honek balizko zailtasunak aztertu nahi ditu, hobeto ulertzen eta hedatzen laguntzeko.