Azken eguneratzea: 2009ko azaroa

Duela urtebete, Internet bidez edozein motatako musika entzuteko programa berritzaile eta originala jarri zen abian, streaming bidez abestiak entzun ahal izateko, alegia. Spotify abian den azken hamabi hilabete hauetan 800.000 erabiltzaile lortu eta 6 milioi abesti bildu ditu.

Azken finean, Spotify musika zerbitzua da, eta sei milioi abesti baino gehiago ditu entzungai, guztiak kalitate onean. Programa hau aplikazio bat da eta ez webgunea (beste kasu batzuetan legez), hots, disko gogorrean deskargatu eta instalatu behar dira, baina, horretarako, beharrezkoa da Internetera konektatuta egotea. Bestalde, Spotifyk P2P teknologiaren bidez eskaintzen du musika.

EAEn enpresen kudeaketarako softwarea sortu eta gartzen duten ERP arloko (Enterprise Resource Planning) 35 enpresek "ERPen Merkatua Euskadin 2009" ikerketan parte hartu dute. Azterketaren helburua Euskadin Estatuko negozioaren bolumenaren %8 biltzen duen azpisektore garrantzitsuaren garapena eta joera ikertzea da. SPRIk eta GAIAk sustatutako ikerkuntzaren ondorioak aurkeztu dira.

Azterketan, 2008ko merkatua aurreko urtekoarekin alderatuz, ERPen merkatua Euskadin %7 hazi zela ondorioztatzen da. Modu berean, negozio bolumena 33 milioi eurokoa izan zen, lizentzien salmenta eta egun dauden lizentzien mantentze lanei esker. Bolumenari dagokionez, euskal enpresek espainiar fabrikatzaileen %6 osatzen dute; datu horrek ERPen euskal merkatua Estatuko merkatuaren batez bestekoa baino garatuago dagoela erakusten digu.

John Kao Euskadin egon da hilabete honetan, zientzia, teknologia, berrikuntza, kalitate eta bikaintasunaren asteari hasiera emateko. Kao munduan eragin handieneko ahotsetako bat da berrikuntza eta sormenaren inguruko gaietan; hori dela eta, 'Mr Creativity' ezizenarekin ere ezagutzen da, The Economist aldizkari ospetsuak Kaori eskaini zion azalean proposatua. Estatubatuarrak Astearen zortzigarren edizioa ireki du; Eusko Jaurlaritzak antolatutako jardunaldiak dira, Innobasque eta Euskalitek koordinatuta.

'Sweet spot'

"Euskadin egoera ezin hobean zaudete berrikuntzan erreferente nagusi bilakatzeko, baina ez bakarrik Europan, baita mundu osoan ere", azaldu du Kaok. Dena den, estatubatuarrak argitu du gora egiten jarraitzeko ezinbestekoa dela berak deitutako 'sweet spot' edo 'gozo gunea' aurkitzea, hau da, "Euskadirentzat azkarra eta goxoa dena aurkitu behar da".

Donostian antolatutako ekitaldiaren buru Patxi López Eusko Jaurlaritzako lehendakaria izan da; "I+G+b ekuazioari beste elementu bat gehitu behar diogu, eta, aldi berean, kanpotik Euskadira eraka-rri behar ditugu inbertsio eta garapenak", esan du Lópezek.

Tekniker-IK4 liderra da, batez ere olio biodegradagarrien arloan; azken bolada honetan formulazioak eta entseguak egiten ditu, eta ziurtatzen dute gaur egungoak baino askoz ezaugarri hobeak izango dituztela. Beraz, petroliotik eratorritakoekin lehiatu ahal izango dira erabilera industrialetan.

Kontuan izatekoa da gaur egun Europa osoan erabiltzen diren lubrifikatzaileen %95 ez direla biodegradagarriak; Espainian tona erdi lubrifikatzaile erabiltzen da urtean, hau da, ibaietako kutsadura %40 areagotzen da. Horregatik, formula berri honekin, ingurumenari kalte gutxiago egitea bilatzen dute, garapen iraunkorra lortzeko bidean.

BIOBESIN proiektua

Eibarko teknologia zentroak ikerketa-lerro bat dauka teknologia eramangarriaren arloan; erronka edo proiektu horren izena BIOBESIN da.

Produktu berri horiek aplikazio zuzena dute industria eremu askotan, eta Europar Euroetiketaren araberako biodegradagarritasuna eta toxikotasun ezaren irizpideak oinarritzat hartuta diseinatzen dira. BIOBESIN proiektuak bultzatutako biolubrifikatzaileen gama berri hau aurrerabidean jartzeak abantaila asko dakartza; horien artean aipa daitezke, besteak beste, espainiar industriaren berezko produkzioaren teknologiaren sorrera, patenteez babestutakoa, edota produkzio-kostuen urritzea.