Hainbat enpresak Bilbo diseinuaren munduko
hiriburua izatearen alde egin dute

RED-Españako Diseinu Enpresen Elkarteak aditzera eman du Bilboko hautagaitzaren aldeko jarrera, 2014an Diseinuaren Munduko Hiriburu izan dadin. Ondoren, “Diseinua berrikuntzaren bektore gisa” saioa izan da, eta bertan mintzatu dira Nani Marquina, REDeko presidentea; Andoni Aldekoa, Bilboko Udaleko kontseilari ordezkaria; Joan Mellen, REDeko zuzendari nagusia, eta Guillermo Ulacia, Innobasqueko presidentea.

Hautagaitzaren aldeko argudioak

Marquina izan da lehenengoa hitz egiten; “Bilbok diseinuarekiko konpromisoa erakutsi du proiektuak bultzatzeko orduan. Pentsamolde hori euskal enpresetan ere badago eta horren erakusgarri da eskaintzen duten produktu zaindua”, adierazi du REDeko presidenteak.

Bestalde, Andoni Aldekoa Bilboko Udaleko kontseilari ordezkariak World Design Capital antolatzen duen Industria Diseinuaren Nazioarteko Kontseiluko kideei Bilbok aurkeztu dien proiektua erakutsi du.

Joan Mellenen iritziz, “REDek duen aktiborik eta onurarik garrantzitsuenetako bat desberdintzea edo bereiztea lortzeko bilaketa eta lana da”.

Lehiakortasuna

IK4ren Batzorde Estrategikoaren bigarren osoko bilkura uztailean anolatu zen, eta bertan enpresaren hurrengo helburuak edo erronkak ezagutzera eman zituen. Lehenengo eta behin, argi utzi dute EAEko ingurune zientifiko-teknologikoko eragile garrantzitsuenen artean gogoeta partekatuko prozesu bat egingo dutela, “Aliantzaren etorkizuneko jardueraren oinarri estrategikoak ezartzeko”.

IK4 Aliantzak 2009-2012ko Plan Estrategikoaren azken txanpari ekiten dio EAEko industriari eta ezagutzaren merkatu orokorrari begira, gogoeta-prozesu hau 2012-2016ko Plan Estrategikoa izango denarekin lotuz. Hala, Batzorde Estrategikoak hurrengo hilabeteetan gogoeta-ardatz izango diren sei erronken oinarriak finkatu zituen.

Sei erronka

Aipatutako sei erronka estrategiko horiei buruzko gogoeta-prozesua gauzatzeko, beste hainbeste lantalde sortu ziren, eta Aliantzaren erabaki estrategikoak zuzenduko dituzten txostenak egingo dituzte.